看看這新聞的標題:Tit for tat: U.S. boots Ecuadorian ambassador

厄瓜多爾趕美國大使走，而美國就把厄瓜多爾大使踢走，話佢係不受歡迎人物，而狐狸新聞就叫 tit for tat。如果一查字典，意即 "equivalent retaliation".

中文可以翻譯以其人之道還治其人之身，如果口語化一Ｄ，應該叫做你做初一，我做十五。以後如果有人問你，你做初一我做十五英文點講，你咪話 You do first day of the month, I do fifteenth of the month. 你識得話 tit for tat 啦。

一宗事件，一單意外，就算一鑊都好吖！乜鬼嘢叫做一起呀？一起意外，我以為係齊齊出事。好似講個仔出意外地點，竟然係佢老豆三年前出意外同一地點，新聞話：某某意外喪生，竟是三年前其父親三年前一起意外遇難地點相同，如果你唔講一起即係一宗咁解，我以為你講乜春？一時又話佢今日死，一時又話佢三年前同佢老豆一齊死，到底佢幾時死？大陸興咁寫架？

最憎見到的，就是不排除呢三個字，乜嘢叫不排除啫？你可唔可以寫或會，難免，呢啲字好普遍啫，你唔係唔識嘛？ 例如話，某某不排除會採取法律行動，唓！你可唔可以寫某某或會採取去律行動，係咪好聽啲呢？

又見到編輯專欄話妖魔化美國！超，乜Ｑ嘢叫妖魔化呀？原來係英文 demonize 的中譯。即是唔係人話，係鬼話啦。中文有抹黑，有醜化，又可以一齊叫抹黑醜化美國，點解一定要叫妖魔化呀？妖！

又一個睇到眼火爆的中文，乜嘢叫做自我矮化呀？你識唔識中文有兩字叫做自貶呀？ 你唔喜歡用自貶兩個字，不如用四個字，妄自菲薄，自慚形穢，都好過自我矮化咁低能吖？

再來多個話矮化中國，乜嘢叫做矮化呀？你侮辱鄧小平定拿破崙呀？你可唔可以寫貶低中國呢？貶低呢兩隻字你唔識呀？

好似在尊重生命一文中，寫到「都顯露出一種不同程度對人類生命的不尊重」嘩！你可唔可以寫「都顯露出不同程度的漠視生命」呀！程度，使唔使要講明係一種呀？「尊重生命」的相反，係「漠視生命」。唔係「對人類生命的不尊重」呀！如此狗屎垃圾中文，小學生都不如。

又在人質事件面面觀一文中，呢句睇到我眼都側埋，乜嘢叫做「她相信如果換了是英國或美國人是人質，結果便會不一樣。」但人話係咁講嘅：「她相信如果人質換作是英國或美國人，結果便不一樣。」跟住你話「言下之意」一句攪掂，使唔使話「聽其言下之意」呀？「聽其」呢兩個字，多餘嘅。